ကိုဗစ်ကာလအတွင်း ပြင်ဦးလွင်မြို့မဈေးမှ အသင်းဝင်များအား ထောက်ပံ့ငွေ သိန်း(၁၅၀) ကျော် ပေးအပ်

မန္တလေးတိုင်းအတွင်း ပြင်ဦးလွင်မြို့ရှိ မြို့မဈေးမှ အသင်းဝင်များအား ထောက်ပံ့ကြေးငွေများကို အောက်တိုဘာလ ( ၈ ) ရက်နေ့တွင် ငွေကျပ် သိန်း (၁၅၀) ကျော်အား ပေးအပ်ခဲ့ပြီး ဖြစ်ကြောင်း သိရှိရသည်။

မန္တလေးတိုင်းဒေသကြီး ပြင်ဦးလွင်မြို့ မြို့မဈေးကြီးမှ ငွေစုငွေချေးသမဝါယမအသင်းသည် COVID-19 ရောဂါကာကွယ်ထိန်းချုပ်ရေး ကာလအတွင်း ဒုတိယအကြိမ်အဖြစ် မြို့မဈေးကြီးမှ ဈေးသူဈေးသားများ ဖြစ်သော သမဝါယမ အသင်းသားများနှင့်  မြို့နယ်သမဝါယမဦးစီးဌာနမှ ဝန်ထမ်းများ၊ အသင်းဝန်ထမ်းများအား ထောက်ပံ့ကြေး ပေးအပ်ခဲ့ကြောင်း သိရှိရသည်။ 
 
ထောက်ပံ့ကြေးငွေ ရရှိသူသည် စုစုပေါင်း အယောက် (၇၇၀)  ကျော် ရှိပြီး တစ်ဦးလျှင် ငွေကျပ် (၂၀,၀၀၀)    နှုန်းဖြင့် ပေးအပ်ခဲ့ရာ စုစုပေါင်း ငွေကျပ်သိန်း  (၁၅၀)  ကျော်ကို အောက်တိုဘာလ (၉) ရက်နေ့က ထောက်ပံ့ပေးခဲ့ကြောင်း သိရသည်။

ကျန်းမာ‌ရေးနှင့် အားကစားဝန်ကြီးဌာန၏ အောက်တိုဘာလ ၉ ရက်၊ ၂၀၂၀ ( မနက် ၈ နာရီအချိန် ) ထုတ်ပြန်ချက်များအရ ပြင်ဦးလွင်မြို့နယ်တွင် COVID-19 ဓာတ်ခွဲအတည်ပြု စုစုပေါင်းလူနာ ( ၁၁ ) ဦး ရှိပြီ ဖြစ်ကြောင်း သိရသည်။
 
မြန်မာတစ်နိုင်ငံလုံးတွင် မတ်လ ၂၃ ရက်နေ့မှ ယနေ့အထိ COVID-19 ဓာတ်ခွဲအတည်ပြုလူနာ စုစုပေါင်း (၂၂,၄၄၅) ဦးရှိပြီး ဆေးရုံဆင်းခွင့်ရသူ (၆,၃၆၆) ဦး ရှိပြီ  ဖြစ်ကာ သေဆုံးလူနာ (၅၃၅) ဦး ရှိပြီ ဖြစ်သည်။