မန္တလေးတိုင်းသို့ ယာဉ်မောင်းနှင့်နောက်လိုက်များ ကိုဗစ်ကင်းစင်ကြောင်း ထောက်ခံချက်ပါမှ ဝင်ရမည်

မန္တလေးတိုင်းဒေသကြီးအတွင်း ကုန်တင်ယာဉ်များ ကုန်တင် ကုန်ချလိုပါက ယာဉ်မောင်းနှင့် ယာဉ်နောက်လိုက်များ အနေဖြင့် ကိုဗစ်ကင်းစင်ကြောင်း ထောက်ခံချက်ပါရှိရမည် ဖြစ်ပြီး ယင်းထောက်ခံချက် ပါရှိမှသာ မြို့အတွင်းသို့ ဝင်ရောက်ခွင့် ရှိမည် ဖြစ်သည်။ 

ထောက်ခံချက် ပါရှိကြောင်းအား ရမည်းသင်းမြို့သို့ အဝင် စစ်ဆေးရေးဂိတ်တွင် အာခေါင်တို့ပတ်၊ နှာခေါင်းတို့ပတ် (Swab) နမူနာယူစစ်ဆေးပြီး ကိုဗစ်ကင်းစင်ကြောင်း ထောက်ခံချက်ရရှိမှသာ တိုင်းဒေသကြီးအတွင်း ကုန်တင် ကုန်ချခွင့်ပြုမည်ဖြစ်ကြောင်း သိရသည်။

မန္တလေးမြို့တွင်းတွင်း ရောဂါပြန့်ပွားနေမှုမှ ကာကွယ်ရန် စက်တင်ဘာလ (၂၁) ရက်နေ့ကတည်းက မန္တလေး ကုန်စည်ဒိုင်အား ယာယီပိတ်ပင်ခဲ့သည်။ ထို့အပြင် တိုင်းဒေသကြီး အတွင်းမှ ပြည်သူများ အနေဖြင့် ရောဂါကူးစက် ပြန့်ပွားမှုကို ထိန်းသိမ်းကာကွယ်ရန် ယခုကဲ့သို့ ဆောင်ရွတ်နေခြင်း ဖြစ်သည်။ 

အဆိုပါ ထောက်ခံချက်သည် (၁၄) ရက်သက်တမ်းသာ ရရှိမည်ဖြစ်ပြီး၊ သတ်မှတ်ရက်ပြည့်ပါက နောက်တစ်ကြိမ် စစ်ဆေးမှုခံယူရမှာဖြစ်ကြောင်း မန္တလေးတိုင်းဒေသကြီး၊ ယာဉ်လုပ်ငန်းများကြီးကြပ်ရေးလုပ်ငန်းကော်မတီ ဥက္ကဋ္ဌ ဦးသန်းအောင်က ပြောကြားသည်။

ပြည်သူများအနေဖြင့် မိမိကိုယ်တိုင် လည်းကောင်း၊ မိမိ၏မိသားစုနှင့် မိမိပတ်ဝန်းကျင်အား လည်းကောင်း COVID-19 ရောဂါပိုး ကူးစက်ပြန့်ပွားမှုကို အစိုးရနှင့်ပြည်သူ ပူးပေါင်းဆောင်ရွက်ခြင်းဖြင့် ကာကွယ်ဟန့်တားနိုင်ပါသည်။ ထို့ကြောင့် အစိုးရမှ ထုတ်ပြန်ထားသော အကြောင်းအရာများကို မဖြစ်မနေ လိုက်နာကြရမည် ဖြစ်ပါကြောင်း တိုက်တွန်းပြောကြား လိုက်ပါသည်။